ᑲᑎᑎᓪᓗᒋᑦ ᐆᒻᒪᑏᑦ ᐊᒻᒪᓗ ᐊᖏᕐᕋᕆᔭᐅᔪᑦ ᓄᓇᕕᒻᒥ, ᓄᓇᕗᒻᒥ ᐊᒻᒪ ᐃᓄᐃ ᓄᓇᖓᓂ ᓄᓇᓕᖏᑦ ᑲᑐᔾᔨᓂᒃᑯᑦ ᐃᖏᕐᕋᓂᖃᕐᓂᐊᕐᒪᑕ ᖃᓄᐃᖏᑦᑎᐊᕐᓂᐅᔪᒥᒃ.

ᐊᑎᕗᑦ ᑐᑭᖃᖅᑐᖅ “ᓴᐃᓕᕕᒃ,” ᐊᒻᒪᓗ ᑕᐃᒪᓐᓇ ᓴᖅᑮᓇᓱᐊᖅᑐᒍᑦ ᓄᓇᓕᓐᓂ ᐅᑭᐅᖅᑕᖅᑐᒥ. ᐊᖅᑯᑎᒋᓪᓗᒍ ᐊᓯᔾᔩᔾᔪᑕᐅᕙᓪᓕᐊᔪᑦ ᐃᓅᓯᕐᒧᑦ ᐊᔪᕈᓐᓃᓴᓂᒃᑯᑦ (TLS), ᐊᑐᐃᓐᓇᖃᖅᑐᒍᑦ ᐱᔭᕆᐊᑭᑦᑐᓂ, ᖁᐊᖅᓵᕈᑕᐅᓯᒪᔪᓄᑦ ᑐᑭᓯᒋᐊᕈᑎᔅᓴᓂᒃ ᐱᓕᕆᔾᔪᑎᓂᒃ−ᑐᓐᖓᕕᖃᖅᑐᑎᒃ ᑎᒥᒻᒥ ᐊᐅᓚᑎᑦᑎᓂᕐᒥᒃ, ᐊᓂᖅᓵᖅᑐᓂᕐᒥᒃ, ᐊᒻᒪ ᕿᑎᐊᓃᓐᓂᒥᓪᓗ−ᐃᑲᔪᖅᑐᐃᔪᑦ ᓴᐃᓕᔾᔪᑎᔅᓴᓂᒃ ᐱᓕᕆᐊᖃᕋᓗᐊᖅᑎᓪᓗᒋᑦ ᐅᓪᓗᖏᓐᓂ. ᐃᓪᓗᕈᓯᕐᒦᒃᑲᓗᐊᕈᕕᑦ ᐅᕝᕙᓘᓐᓃᑦ ᐊᖏᕐᕋᒥ, ᓴᐃᒪᕕᒃ ᐃᓂᐅᔪᖅ ᓴᓐᖓᑎᑦᑎᕚᓪᓕᕋᓱᐊᖅᑐᖅ ᓴᐱᓕᖅᑕᐃᓕᓂᕐᒥ, ᐃᓱᒪᒃᑯᑦ ᖃᓄᐃᖏᑦᑎᐊᕈᓐᓇᕐᓂᕐᒥᒃ, ᐊᒻᒪ ᐃᖅᑲᐅᒪᓗᑎᓪᓗ ᐃᓗᒃᑯᑦ ᓴᖏᓐᓂᖏᑦ ᓇᒧᓐᖓᕈᑎᒋᔪᓐᓇᕐᒪᒋᑦ ᖃᖓᑐᐃᓐᓇᑦᑎᐊᒃᑯᑦ.

ᐅᑯᐊ ᑎᑎᖅᑲᑦ ᐊᒻᒪ ᓂᐱᓕᐅᖅᓯᒪᔪᑦ ᐊᑐᐃᓐᓇᐅᔪᑦ ᐱᔭᐅᔪᓐᓇᖁᓪᓗᒋᑦ ᖃᕆᓴᐅᔭᒃᑯᑦ ᓴᓇᔭᐅᓯᒪᔪᑦ, ᑐᑭᓕᐅᖅᑕᐅᓯᒪᔪᑦ, ᐊᒥᓱᕈᖅᑎᑕᐅᓯᒪᓪᓗᑎᑦ ᐊᒻᒪ ᑐᓂᐅᖅᑲᖅᑕᐅᓯᒪᔪᑦ ᑮᓇᐅᔭᖃᖅᑎᑕᐅᓪᓗᑕ ᓄᓇᕗᑦ ᑐᓐᖓᕕᒃᑯᓐᓄᑦ ᐅᖃᐅᓯᕐᖓᖅ ᑮᓇᐅᔭᖁᑎᖏᑎᒍᑦ ᐊᒻᒪ ᒐᕙᒪᑐᖃᒃᑯᓐᓂ ᑲᓇᑕᒥ ᐃᑦᑕᕐᓂᓴᓕᕆᔨᒃᑯᑎᒍᑦ. ᓄᓇᕕᒻᒥ, ᑮᓇᐅᔭᖃᖅᑎᑦᑎᔨᕗᑦ ᐅᑯᐊᖑᕗᑦ ᓄᓇᕕᒻᒥ ᐊᕕᒃᑐᖅᓯᒪᓂᐅᔪᓂᒃ ᑲᑎᒪᔩᑦ ᐊᒻᒪ ᐃᓄᓕᕆᔨᒃᑯᑦ (NRBHSS) ᐊᒻᒪᓗ ᒪᑭᕝᕕᒃᑯᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐃᓗᓕᖏᑦ ᑮᓇᐅᔭᖁᑎᖏᑎᒍᑦ.